ठाणे : ‘यावर्षी राज्यात २९ ऑक्टोबर ते तीन नोव्हेंबर २०१८ या कालावधीत दक्षता जनजागृती सप्ताहाचे आयोजन करण्यात आले आहे. यानिमित्त ठाणे येथील लाचलुचपत प्रतिबंधक विभागामार्फत जिल्ह्यातील राज्य सरकारचे विभाग, सहकारी संस्था, स्वायत्त संस्था, तसेच सर्वसामान्य नागरिकांमध्ये यासंदर्भात जनजागृती केली जाणार आहे,’ अशी माहिती लाचलुचपत प्रतिबंधक विभागाचे पोलीस अधीक्षक डॉ. महेश पाटील यांनी दिली.

२९ ऑक्टोबरला सर्व शासकीय कार्यालयांत भ्रष्टाचार निर्मुलनाची शपथ घेऊन सप्ताहाला सुरुवात होणार आहे. सप्ताहाबाबत माहिती होण्यासाठी सर्व कार्यालयांत फलक, बॅनर्स लावणे, शाळा, महाविद्यालयांत भ्रष्टाचाराच्या परिणामांची माहिती देण्यासाठी विविध कार्यक्रम घेण्यात येणार आहेत. त्याचबरोबर चित्रपटगृहे, सार्वजनिक ठिकाणे याठिकाणी या मोहिमेची व्यापक प्रसिद्धी केली जाईल. याशिवाय प्रमुख कार्यालयांत बैठका घेऊन लाचखोरीसंदर्भात, तसेच विभाग करीत असलेल्या कार्यवाहीची, कायद्यातील तरतुदींची व्यापक माहिती देण्यात येणार आहे.

ठाणे कार्यालयाच्या परिक्षेत्रात ठाणे, नवी मुंबई, पालघर, रायगड, रत्नागिरी, सिंधुदुर्ग हे जिल्हे येत असून, याठिकणीही विविध कार्यक्रम साजरे केले जाणार आहेत. या उपक्रमात अशासकीय संघटना, स्वयंसेवी संस्थाबरोबर नागरिकांनी सहभागी होण्याचे, तसेच लाचेसंदर्भातील तक्रारींची माहिती देण्याचे आवाहन करण्यात आले आहे.  

लाचेसंदर्भातील तक्रारी देण्यासाठी संपर्क : १०६४
ठाणे लाचलुचपत प्रतिबंधक कार्यालयाचा ई-मेल : spacbthane@mahapolice.gov.in